អឺរ៉ុប៖ សមាគមក្លិបបាល់ទាត់អឺរ៉ុប ឬ European Club Association (ECA) កាលពីថ្ងៃចន្ទម្សិលមិញនេះ បានបញ្ជាក់ថាក្លិបបាល់ទាត់ចំនួន ៩ ក្នុងចំណោម ១២ក្លិបដែលបានព្រមព្រៀងគ្នាក្នុងការបង្កើតពាន European Super League កាលពីពេលកន្លងទៅ បានស្នើបន្តសមាជិកភាពរបស់ខ្លួនបន្តជាមួយ ECA ឡើងវិញ ក្រោយពីគម្រោងនៃការបង្កើតពានសម្រាប់ការប្រកួតប្រជែងថ្មី European Super League ទទួលបរាជ័យ។ យ៉ាងណាក្តី នៅមានក្លិបចំនួន ៣ ដែលជាស្ថាបនិកនៃពាននេះនៅតែមិនទាន់បានបញ្ចូលខ្លួនមកក្នុងការប្រកួត​ប្រជែងពានអឺរ៉ុបវិញនៅឡើយទេ។

ក្លិបទាំង ៣ ដែលនៅមិនទាន់ត្រឡប់មកចូលរួមជាមួយសមាគមក្លិបអឺរ៉ុបឡើងវិញនេះរួមមាន Real Madrid, Barcelona និង Juventus ដោយក្លិបទាំងនេះនៅតែបង្ហាញក្តីសង្ឃឹមនៃការរៀបចំការប្រកួត Super League ដដែល បើទោះបីជាគម្រោងនេះបានទទួលបរាជ័យតាំងពីខែមេសាកន្លងទៅក៏ដោយ។

សមាគមក្លិបបាល់ទាត់អឺរ៉ុបបានប្រកាសថា ក្លិបទាំង៩ ដែលត្រឡប់មកចូលរួម និងបន្តសមាជិកភាពជាមួយ ECA រហូតដល់ឆ្នាំ២០២៣ ដូចដើមនោះរួមមាន AC Milan, Arsenal , Chelsea , Atletico Madrid Inter Milan, Liverpool, Manchester City, Manchester United និង Tottenham Hotspur។

ក្រុមប្រឹក្សាប្រតិបត្តិ​ ECA កន្លងមកបានលើកឡើងថា គម្រោង Super League នេះមិនស្ថិតក្នុងការអភិវឌ្ឍន៍នៃសហគមន៍បាល់ទាត់ទាំងមូលឡើយ ដែលប្រាកដណាស់ថានេះគឺជាមូលហេតុដែលយើងទាមទារឱ្យមានការលុបចោល និងបោះបង់គម្រោងនៃការរៀបចំការប្រកួតនេះ។

គួរបញ្ជាក់ថា ប្រធានក្លិប PSG លោក Nasser Al-Khelaifi ត្រូវបានតែងតាំងជាប្រធាននៃ ECA កាលពីខែមេសាកន្លងទៅ ក្រោយពីលោក Andrea Agnelli  នាយកក្លិប Juvnetus បានចុះចេញពីតំណែង ក្រោយពីលោកបានចូលរួមពេញទំហឹងក្នុងការពិភាក្សាបង្កើតពាន European Super League៕